મહેસાણા જિલ્લામાં ‘JOSH’ ટીમો દ્વારા ટીબી મુક્ત ભારત અભિયાનને વેગ અપાશે: માય ભારત વોલેન્ટિયર્સ માટે વિશેષ તાલીમ કાર્યક્રમ યોજાયો*

સરકારી આરોગ્ય સુવિધાઓ અને ટીબીના સચોટ નિદાન અંગે ગ્રામ્ય સ્તર સુધી જનજાગૃતિ ફેલાવવાનો લક્ષ્યાંક* *મહેસાણા, ૦૨ નવેમ્બર, ૨૦૨૬* ભારત સરકારના JOSH (Joint Squad for Health) Teams કાર્યક્રમ અંતર્ગત મહેસાણા જિલ્લામાં ટીબી મુક્ત ભારત અભિયાનને વધુ વેગવાન બનાવવા તથા જનજાગૃતિ અને જનભાગીદારી વધારવાના હેતુથી માય ભારત વોલેન્ટિયર્સ માટે ટીબી જાગૃતિ અને માર્ગદર્શન કાર્યક્રમનું આયોજન કરવામાં આવ્યું હતું. જિલ્લા કલેક્ટરશ્રી અને જિલ્લા વિકાસ અધિકારીશ્રીના માર્ગદર્શન હેઠળ, મુખ્ય જિલ્લા આરોગ્ય અધિકારીશ્રી તથા જિલ્લા ક્ષય અધિકારીશ્રીના આયોજન અને માર્ગદર્શનથી જિલ્લાના દરેક તાલુકામાં JOSH ટીમોની રચના કરવામાં આવી છે. આ ટીમોમાં વર્ગ-૧ના અધિકારીશ્રીને નોડલ અધિકારી તરીકે નિયુક્ત કરવામાં આવ્યા છે. સાથે જ દરેક તાલુકામાં પાંચ માય ભારત વોલેન્ટિયર્સ અને પાંચ NCC કેડેટ્સની પસંદગી કરવામાં આવી છે. આ ટીમો દ્વારા ટીબી મુક્ત ભારત અભિયાન અંતર્ગત વિવિધ જનજાગૃતિલક્ષી પ્રવૃત્તિઓ હાથ ધરવામાં આવશે. ગામડાંઓ અને શહેરી વિસ્તારોમાં લોકો સુધી ટીબી અંગે સાચી અને સચોટ માહિતી પહોંચાડવી, રોગનાં લક્ષણો વિશે જાગૃતિ ફેલાવવી, સમયસર તપાસ અને નિયમિત સારવાર માટે પ્રોત્સાહિત કરવા તેમજ જનભાગીદારી દ્વારા ટીબી મુક્ત સમાજના નિર્માણમાં યોગદાન આપવું એ આ ટીમોનો મુખ્ય ઉદ્દેશ છે. આ કાર્યક્રમમાં જિલ્લા ક્ષય અધિકારીશ્રી ડૉ. હરેશ પટેલ,મેડિકલ ઓફિસરશ્રી ડૉ. નરેન્દ્ર ચૌધરી, જીલ્લા પી.પી.એમ કો-ઓડિનેટરશ્રી કેયુર જયસ્વાલ દ્વારા માય ભારત વોલેન્ટિયર્સને ટીબી રોગ અંગે વિગતવાર માહિતી આપવામાં આવી હતી. કાર્યક્રમ દરમિયાન ટીબીનાં મુખ્ય લક્ષણો, સમયસર નિદાન, સરકારી આરોગ્ય સંસ્થાઓમાં ઉપલબ્ધ તપાસ અને સારવારની સુવિધાઓ, સારવારનો સંપૂર્ણ કોર્સ પૂરો કરવાનું મહત્ત્વ તથા ટીબી અંગે પ્રવર્તતી ગેરમાન્યતાઓ દૂર કરવા જેવા મહત્ત્વપૂર્ણ વિષયો પર માર્ગદર્શન આપવામાં આવ્યું હતું. વધુમાં, JOSH ટીમ અંતર્ગત માય ભારત વોલેન્ટિયર્સ અને NCC કેડેટ્સની ભૂમિકા સમજાવતાં જણાવવામાં આવ્યું હતું કે, યુવાનો સમાજમાં આરોગ્ય જાગૃતિના સશક્ત માધ્યમ બની શકે છે. તેઓ રેલી, જનસંપર્ક, શાળા-કૉલેજ સ્તરની પ્રવૃત્તિઓ, જાગૃતિ સંદેશાઓના પ્રસાર અને વિવિધ સામુદાયિક કાર્યક્રમો દ્વારા લોકોને ટીબી અંગે જાગૃત કરી શકે છે. ટીબીનાં શંકાસ્પદ લક્ષણો ધરાવતા વ્યક્તિઓને સમયસર આરોગ્ય તપાસ માટે પ્રેરિત કરવા તથા ટીબીથી અસરગ્રસ્ત વ્યક્તિઓ પ્રત્યે ભેદભાવ ન રાખવા અંગે પણ જનજાગૃતિ ફેલાવવામાં આવશે. આ પહેલના માધ્યમથી મહેસાણા જિલ્લાના દરેક તાલુકામાં JOSH ટીમો સ્થાનિક સ્તરે આરોગ્ય વિભાગ સાથે સંકલન સાધીને ટીબી મુક્ત ભારત અભિયાનને જનઆંદોલનનું સ્વરૂપ આપવા માટે કામગીરી કરશે. યુવાનોની સક્રિય ભાગીદારીથી ટીબી અંગે જાગૃતિ વધશે અને સમયસર નિદાન તથા સારવાર અંગે લોકોમાં વધુ સમજ વિકસશે તેવી આશા વ્યક્ત કરવામાં આવી હતી.