રિપોર્ટર ઘિસારામ ચૌધરી**ભિસ્યા ગામે દિવાળી નિમિત્તે યુવક મંડળનો ભવ્ય સાંસ્કૃતિક કાર્યક્રમ યોજાયો**ધારાસભ્ય વિજયભાઈ પટેલ સહિત ભાજપના અગ્રણીઓએ ઉપસ્થિત રહી યુવા કલાકારો અને બાળકોની કલાત્મક પ્રતિભાને બિરદાવી*

સંજેલીમાં નવી ફસલી પર્વની શ્રદ્ધા અને ઉત્સાહભેર ઉજવણી : ગોવિંદગુરુ ચોક ખાતે ઝાંપા પૂજન, પ્રતિમાની સેવા-અર્ચના સાથે સેવાકાર્ય યોજાયું સંજેલી : આદિવાસી સમાજની આગવી અસ્મિતા, સાંસ્કૃતિક વિરાસત અને પરંપરાગત રીતરિવાજોના જતનના સંદેશ સાથે સંજેલી ખાતે નવી ફસલી તહેવારની ઉત્સાહભેર ઉજવણી કરવામાં આવી હતી. આદિવાસી પરિવાર સંજેલી દ્વારા ગોવિંદગુરુ ચોક ખાતે નવી ફસલી પર્વ નિમિત્તે ઝાંપા પૂજન, સેવાકાર્ય તેમજ ગુરુ ગોવિંદગુરુની પ્રતિમાની સેવા-અર્ચનાનો કાર્યક્રમ યોજવામાં આવ્યો હતો. આ પ્રસંગે પરંપરાગત વિધિ-વિધાન સાથે ઝાંપા પૂજન કરી સમાજની સુખાકારી, શાંતિ અને સમૃદ્ધિ માટે પ્રાર્થના કરવામાં આવી હતી. આ ઉપરાંત મહાન આદિવાસી સંત અને સમાજ સુધારક ગુરુ ગોવિંદગુરુની પ્રતિમાની સેવા-અર્ચના કરી તેમને શ્રદ્ધાપૂર્વક વંદન કરવામાં આવ્યું હતું. નવી ફસલી પર્વ આદિવાસી સમાજની પરંપરા અને પ્રકૃતિ સાથેના અતૂટ સંબંધનું પ્રતીક છે. ખેતી અને નવી ઉપજ સાથે જોડાયેલા આ પર્વમાં ધરતીમાતા, પ્રકૃતિ અને પૂર્વજો પ્રત્યે આભાર વ્યક્ત કરવાની ભાવના રહેલી છે. આ તહેવાર માત્ર ઉજવણી પૂરતો મર્યાદિત નથી, પરંતુ સમાજની એકતા, ભાઈચારો, સંસ્કૃતિ અને સામૂહિક જીવનમૂલ્યોને મજબૂત બનાવવાનો અવસર પણ છે. આદિવાસી પરિવાર સંજેલી દ્વારા યોજાયેલા સેવાકાર્ય થકી સેવા, સમર્પણ અને સામાજિક એકતાનો સુંદર સંદેશ આપવામાં આવ્યો હતો. પોતાની પરંપરા અને સંસ્કૃતિને આવનારી પેઢી સુધી પહોંચાડવા તથા આદિવાસી સમાજની ઐતિહાસિક ઓળખ અને ગૌરવને જાળવી રાખવાના હેતુથી આવા કાર્યક્રમોનું વિશેષ મહત્ત્વ છે. આ પ્રસંગે સૌએ આવનારું નવું વર્ષ સમગ્ર આદિવાસી સમાજ સહિત સૌના જીવનમાં સુખ, શાંતિ, સમૃદ્ધિ, સારું સ્વાસ્થ્ય અને ખુશીઓ લઈને આવે તેવી પ્રાર્થના કરી હતી. કાર્યક્રમના અંતે "ગુરુ જય જોહાર, જય ભીલ પ્રદેશ, જય આદિવાસી" ના ગગનભેદી જયઘોષ સાથે આદિવાસી અસ્મિતા, એકતા અને સ્વાભિમાનનો સંદેશ ગુંજી ઊઠ્યો હતો.

પ્રકૃતિના ખોળે સંસ્કારોની મહેક : દિવાળીના પર્વે અંતરિયાળ વિસ્તારનાં બાળકોને મીઠાઈ, ફરસાણ અને શૈક્ષણિક કીટનું વિતરણ સાબરકાંઠા: દિવાળીના પાવન પર્વ નિમિત્તે નાના કોટડા યુવા સંગઠન દ્વારા અંતરિયાળ વિસ્તારનાં બાળકો સાથે સ્નેહ, સંસ્કાર અને સેવાની અનોખી ઉજવણી કરવામાં આવી હતી. વર્ષ 2021માં માત્ર 30 બાળકો સાથે શરૂ થયેલી ‘સ્નેહ પ્રસાદ યાત્રા’ આજે સફળતાના છઠ્ઠા વર્ષમાં પ્રવેશી 500થી વધુ બાળકોના ચહેરા પર સ્મિત લાવતું પ્રેરણાદાયી સેવાકાર્ય બની છે. ઈડર તાલુકાના નાના કોટડા ગામના યુવાનો દ્વારા શરૂ કરવામાં આવેલી આ સેવા પ્રવૃત્તિ અંતર્ગત દર વર્ષે ખેડબ્રહ્મા, પોશીના અને વિજયનગર તાલુકાના અંતરિયાળ ગામોમાં જઈ બાળકો સાથે દિવાળીની ખુશીઓ વહેંચવામાં આવે છે. આ વર્ષે ખેડબ્રહ્મા તાલુકાનાં ધરોઈ, કંડા, મોટા ફળો અને બેગોડ સહિતનાં ગામોની મુલાકાત લઈ બાળકો સાથે ઉત્સવની ઉજવણી કરવામાં આવી હતી. આ પ્રસંગે બાળકો સાથે રામધૂનનું આયોજન કરી ભારતીય સંસ્કૃતિ, પરંપરા અને સંસ્કારોનું જતન કરવાનો સુંદર સંદેશ આપવામાં આવ્યો હતો. સાથે જ બાળકોને પરંપરાગત મીઠાઈ મોહનથાળ, ફરસાણ, બિસ્કિટ તેમજ તેમના શૈક્ષણિક વિકાસમાં ઉપયોગી બને તેવી શૈક્ષણિક કીટનું વિતરણ કરવામાં આવ્યું હતું. આમ, દિવાળીના પર્વને માત્ર મીઠાઈની વહેંચણી પૂરતો સીમિત ન રાખતાં શિક્ષણ અને સંસ્કારના પ્રકાશ સાથે ઉજવવામાં આવ્યો હતો. આ સેવાયજ્ઞમાં યુવા સંગઠનના મુખ્ય આધારસ્તંભ અજયભાઈ પંડ્યા, નરેશભાઈ સોલંકી (કડિયાદરા), પરેશભાઈ પરમાર, આકાશભાઈ પ્રજાપતિ, ચિંતનભાઈ પટેલ, રોશનભાઈ પટેલ, અમિતભાઈ પ્રજાપતિ, સરલભાઈ પ્રજાપતિ, ભવ્યભાઈ પટેલ, વિકાસભાઈ પટેલ, અક્ષયભાઈ મિસ્ત્રી અને સતિષભાઈ ઝાલા સહિતના યુવાનો તેમજ ગ્રામજનોનો પ્રત્યક્ષ અને પરોક્ષ સહયોગ રહ્યો હતો. કાર્યક્રમ દરમિયાન આયોજકોએ ઉપસ્થિત વાલીઓને પોતાના દીકરા અને દીકરી બંનેને સમાન તક સાથે શિક્ષણ આપવા ભાવભરી અપીલ કરી હતી. શિક્ષણ જ સમાજના ઉજ્જવળ ભવિષ્યનો મજબૂત પાયો છે અને દરેક બાળકને શિક્ષણનો સમાન અધિકાર મળવો જોઈએ તેવો સંદેશ પણ આપવામાં આવ્યો હતો. માત્ર 30 બાળકોથી શરૂ થયેલી આ યાત્રા આજે 500થી વધુ બાળકો સુધી પહોંચી છે, જે નાના કોટડા યુવા સંગઠનના સેવાભાવ, સામૂહિક એકતા અને સમાજ પ્રત્યેની જવાબદારીનું ઉત્તમ ઉદાહરણ પૂરું પાડે છે. યુવાનોના આ સંસ્કારસભર અને પ્રેરણાદાયી સેવાકાર્યને સમગ્ર પંથકમાંથી પ્રશંસા મળી રહી છે.

દ્વારકા: યાત્રાધામ દ્વારકામાં આવેલ ભગવાન શ્રી દ્વારકાધીશના જગતમંદિરમાં દિવાળીના પાવન પર્વની પરંપરાગત અને ઉત્સાહભેર ઉજવણી કરવામાં આવી છે. આજે તારીખ 08 નવેમ્બર 2026 ને રવિવાર, વિક્રમ સંવત 2083 ના દિવાળીના આ શુભ દિને કાળિયા ઠાકોરના સન્મુખ વિશેષ ચોપડા પૂજન અને શારદા પૂજનનું આયોજન કરવામાં આવ્યું હતું. દિવાળી પર્વ નિમિત્તે ભગવાન દ્વારકાધીશને સોનેરી અને આકર્ષક વસ્ત્રો તેમજ દિવ્ય સુવર્ણ અલંકારોનો વિશેષ શ્રૃંગાર ધરાવવામાં આવ્યો હતો. ભગવાનના ચરણોમાં નવા નાણાકીય વર્ષના ચોપડા, કૂમકુમ અને શુભ-લાભના પ્રતીકો સાથે શાસ્ત્રોક્ત મંત્રોચ્ચાર અને ધાર્મિક વિધિ-વિધાન અનુસાર પૂજન કરવામાં આવ્યું હતું. ઠાકોરજી સમક્ષ અન્નકૂટ અને વિવિધ મિષ્ટાન્નોનો ભોગ પણ અર્પણ કરવામાં આવ્યો હતો. આ મનોહર અને અલૌકિક મનોરથ દર્શનનો લાભ લઈને શ્રદ્ધાળુઓ અને વેપારીઓએ નવા વર્ષમાં સુખ, સમૃદ્ધિ અને વ્યાપારિક પ્રગતિ માટે કાળિયા ઠાકોરના આશીર્વાદ મેળવ્યા હતા.

પંચમહાલ જિલ્લાના ગોધરા શહેરમાં આવેલ એલોહીમ મેથોડિસ્ટ ચર્ચમાં દર વર્ષની જેમ આ વર્ષે પણ ખ્રિસ્તી ધર્મના બાળકો માટે V.B.S એટલે વેકેશન બાઇબલ સ્કુલના કાર્યક્રમનું આયોજન કરવામાં આવ્યું હતું જેમાં વર્ષ 2026 માટે V.B.S ડાયરેક્ટર તરીકે શ્રી આશિષ એ કામદાર ને જવાબદારી સોંપવામાં આવી હતી. સેક્રેટરી તરીકે અર્પિતાબેને ક્રિશ્ચિયન અને ટ્રેઝરર તરીકે ઓગસ્ટિનભાઈ પરમારને જવાબદારી સોંપવામાં આવી હતી. 2026 વર્ષના આ V.B.S કાર્યક્રમ માટે ત્રણ વિભાગ પાડવામાં આવ્યા હતા. જેમાં બાળ વિભાગ, મધ્યમ વિભાગ અને સિનિયર વિભાગનો સમાવેશ થાય છે. બાળ વિભાગના શિક્ષક તરીકે શારદાબેન કામદાર અને અર્પિતાબેનએ જવાબદારી સ્વીકારી હતી. મધ્યમ વિભાગના શિક્ષક તરીકે ડેનિશભાઈ છાબડા અને આશિષ કામદાર એ જવાબદારી સ્વીકારી હતી. એ જ રીતે સિનિયર વિભાગના શિક્ષક તરીકે સતિષભાઈ ચંદ્રમલ્લા અને ઓગસ્ટભાઈએ જવાબદારી સ્વીકારી હતી. આ કાર્યક્રમ તારીખ ૦૫/૧૧/૨૦૨૭ ગુરુવાર થી ૦૮/૧૧/૨૦૨૬ રવિવાર સુધી ચાલ્યો હતો. જેમાં પહેલા દિવસે V.B.S કાર્યક્રમને ગોધરા ડિસ્ટ્રિક્ટ સુપ્રિટેન્ડેન્ટ અને એલોહીમ ચર્ચના પાળક રૅવ નગીનકુમાર ચૌહાણ ધ્વારા દીપ પ્રાગટ્ય કરી પ્રભુના પવિત્ર નામમાં ખુલ્લો મૂકવામાં આવ્યો હતો. V.B.S ના ત્રણ દિવસના આ કાર્યક્રમ માટે ત્રણ દિવસ અલગ અલગ નાસ્તાના સ્પોન્સર સેવામાં આગળ આવ્યા હતા. જેમાં પહેલા દિવસે ફતેસિંહભાઈ છાબડા બીજા દિવસે જોસેફભાઈ રાઠોડ અને ત્રીજા દિવસે રાજુભાઈ ધ્વારા બાળકોને સુંદર નાસ્તો પૂરો પાડવામાં આવ્યો હતો. V.B.S 2026 માટે "ન્યાયિપણું રાષ્ટ્રને ઉન્નત કરે છે" નીતિવાચન 14:34, તેમજ થીમ તરીકે "હું મારા દેશને પ્રેમ કરું છું" રાખવામાં આવ્યું હતું. ત્રણ દિવસના આ કાર્યક્રમમાં બાળકોને શિક્ષકો ધ્વારા પવિત્ર અને અદભુત વચનો થકી સુંદર શિક્ષણ આપવામાં આવ્યું હતું. જેમાં સ્વયંમ સેવકો જશવંતભાઈ, વિલિયમભાઇ અને સ્ટેલાબેનનો પણ સેવાકીય ફાળો રહ્યો હતો. આ કાર્યક્રમને સક્ષમ બનાવવા માટે ઉદારતાથી દાન આપનાર તમામનો મહત્વનો ફાળો રહ્યો હતો

અખંડ ભારત ન્યૂઝ ભથવાડા ગામના તળાવમાં પાણીનો અભાવ: ખેડૂતો અને પશુપાલકોની મુશ્કેલીઓ વધી પાઇપલાઇન ગોઠવાઈ છતાં તળાવમાં પાણી ન છોડાતાં ગ્રામજનોમાં નારાજગી દાહોદ | દેવગઢ બારિયા દાહોદ જિલ્લાના દેવગઢ બારિયા તાલુકાના ભથવાડા ગામે પૂર્વ ગ્રામ પંચાયત વિસ્તારમાં આવેલ તળાવમાં પાણીનો અભાવ સર્જાતા આસપાસના ખેડૂતો અને ગ્રામજનોની ચિંતામાં વધારો થયો છે. સરકાર દ્વારા તળાવમાં પાણી પહોંચાડવા માટે પાઇપલાઇન ગોઠવવામાં આવી હોવા છતાં આજદિન સુધી તળાવમાં પાણી છોડવામાં આવ્યું ન હોવાની સ્થાનિકો દ્વારા રજૂઆત કરવામાં આવી રહી છે. તળાવમાં પાણીની અછતને કારણે ખેતીવાડી માટે મુશ્કેલીઓ ઊભી થઈ રહી છે. ખાસ કરીને ડાંગર સહિતના પાક અને ખેતીના કામકાજ માટે પાણીની જરૂરિયાત હોવા છતાં પૂરતું પાણી ઉપલબ્ધ ન થતાં ખેડૂતોને નુકસાન થવાની ભીતિ સતાવી રહી છે. સમયસર પાણી ન મળે તો ખેડૂતોની મહેનત અને આર્થિક સ્થિતિ પર અસર થવાની શક્યતા છે. આ ઉપરાંત પશુપાલકોને પણ પશુઓ માટે પીવાનું પાણી અને ઘાસચારો ઉપલબ્ધ કરાવવામાં મુશ્કેલીઓનો સામનો કરવો પડી રહ્યો છે. ગ્રામ્ય વિસ્તારમાં ખેતી અને પશુપાલન લોકોની આજીવિકાનું મુખ્ય સાધન હોવાથી તળાવમાં પાણીનો અભાવ સમગ્ર વિસ્તાર માટે ચિંતાનો વિષય બન્યો છે. સ્થાનિકોના જણાવ્યા મુજબ, તળાવમાં પાણી પહોંચાડવા માટે પાઇપલાઇનની વ્યવસ્થા કરવામાં આવી છે, પરંતુ તેનો લાભ હજુ સુધી મળ્યો નથી. પાઇપલાઇન ગોઠવ્યા બાદ પણ તળાવમાં પાણી ન પહોંચતાં સરકારી કામગીરી અંગે પ્રશ્નો ઊભા થઈ રહ્યા છે. સ્થાનિક ખેડૂતો અને ગ્રામજનો દ્વારા સંબંધિત સરકારી વિભાગ તથા સિંચાઈ તંત્રને તાત્કાલિક પાઇપલાઇન મારફતે તળાવમાં પાણી છોડવા અને સમસ્યાનું વહેલી તકે નિરાકરણ લાવવા માંગ કરવામાં આવી રહી છે. હવે સંબંધિત તંત્ર દ્વારા આ સમસ્યાને ગંભીરતાથી લઈ તળાવમાં પાણી છોડવા માટે તાત્કાલિક કાર્યવાહી કરવામાં આવે તેવી ગ્રામજનોની આશા છે, જેથી ખેડૂતો, પશુપાલકો અને આસપાસના લોકોને રાહત મળી શકે. રિપોર્ટર: વિનોદ કુમાર વણકર