સંજેલી તાલુકાના ચમારીઆ ગામે યોગની અલખ જગાવતો રાત્રિ યોગ સંવાદ યોજાયો

ચમારીઆ ગામે યોગની અલખ જગાવતો રાત્રિ યોગ સંવાદ યોજાયો ગુજરાત રાજ્ય યોગ બોર્ડની પહેલને ગ્રામજનોનો ઉત્સાહભર્યો પ્રતિસાદ; અનેક ભાઈ-બહેનોએ યોગ ટ્રેનર બની યોગના પ્રચાર-પ્રસારમાં જોડાવાની તૈયારી દર્શાવી સંજેલી, દાહોદ: સ્વસ્થ શરીર, શાંત મન અને નિરોગી સમાજના નિર્માણના ઉમદા સંકલ્પ સાથે ગુજરાત રાજ્ય યોગ બોર્ડ, ગાંધીનગર દ્વારા સંજેલી તાલુકાના ચમારીઆ ગામે રાત્રિ યોગ સંવાદ કાર્યક્રમનું આયોજન કરવામાં આવ્યું હતું. યોગને માત્ર કસરત પૂરતો સીમિત ન રાખતાં તેને જીવનશૈલીનો અભિન્ન હિસ્સો બનાવવાના હેતુથી યોજાયેલા આ કાર્યક્રમમાં ગામના મોટી સંખ્યામાં ભાઈ-બહેનોએ ઉત્સાહભેર ભાગ લીધો હતો. કાર્યક્રમ દરમિયાન યોગ પ્રત્યે ગ્રામજનોમાં અનેરો ઉત્સાહ જોવા મળ્યો હતો. ગુજરાત રાજ્ય યોગ બોર્ડના ચેરમેન આદરણીય યોગસેવક શ્રી શિશપાલજી સાહેબના માર્ગદર્શન તથા ઝોન-3ના ઝોન કો-ઓર્ડિનેટર શ્રીમતી પિન્કીબેનની સલાહ અને પ્રેરણાથી યોજાયેલા આ યોગ સંવાદનો મુખ્ય ઉદ્દેશ વિદ્યાર્થીઓ અને નાગરિકોમાં યોગ પ્રત્યે જાગૃતિ લાવવાનો તેમજ યોગની સંસ્કૃતિને ઘર-ઘર સુધી પહોંચાડવાનો હતો. કાર્યક્રમમાં ઝોન કો-ઓર્ડિનેટર શ્રીમતી પિન્કીબેને યોગનું માનવજીવનમાં રહેલું મહત્ત્વ સમજાવતાં નિયમિત યોગાભ્યાસથી શારીરિક સ્વાસ્થ્ય, માનસિક શાંતિ, એકાગ્રતા અને સકારાત્મક જીવનદૃષ્ટિ કેળવવામાં મળતા લાભો અંગે પ્રેરક માર્ગદર્શન પૂરું પાડ્યું હતું. તેમણે યોગને રોજિંદા જીવનમાં સ્થાન આપી સ્વસ્થ સમાજના નિર્માણમાં સહભાગી બનવા સૌને અનુરોધ કર્યો હતો. આ પ્રસંગે ચમારીઆ ગામના રહીશ નટુભાઈ સેલોતનું વિશેષ સન્માન કરવામાં આવ્યું હતું. ઝોન કો-ઓર્ડિનેટર શ્રીમતી પિન્કીબેન તથા જિલ્લા યોગ કો-ઓર્ડિનેટર શ્રી ધુળાભાઈ પારગીના હસ્તે તેમને ગુજરાત રાજ્ય યોગ બોર્ડની પ્રોટોકોલ બુક અર્પણ કરી સ્વાગત કરવામાં આવ્યું હતું. આ રાત્રિ યોગ સંવાદની સૌથી નોંધપાત્ર બાબત એ રહી કે યોગ વિશેની જાણકારી અને માર્ગદર્શનથી પ્રેરાઈને ચમારીઆ ગામના અનેક ભાઈ-બહેનોએ યોગ ટ્રેનરની તાલીમ મેળવી યોગના પ્રચાર-પ્રસારમાં સક્રિય યોગદાન આપવાની તૈયારી દર્શાવી હતી. આમ, આ કાર્યક્રમ માત્ર યોગ સંવાદ પૂરતો સીમિત ન રહેતાં ગામમાં યોગની નવી ચેતના જગાવનારો પ્રેરણાદાયી પ્રયાસ બન્યો હતો. આ કાર્યક્રમમાં ઝોન કો-ઓર્ડિનેટર શ્રીમતી પિન્કીબેન, જિલ્લા યોગ કો-ઓર્ડિનેટર શ્રી ધુળાભાઈ પારગી, ફતેપુરા યોગ કોચ શંકરભાઈ કટારા, સામાજિક કાર્યકર દિલીપભાઈ મકવાણા, સંજેલી યોગ ટ્રેનર નિકિતાબેન તથા સિંગવડ યોગ ટ્રેનર વિજેશભાઈ સહિતના મહાનુભાવો ઉપસ્થિત રહ્યા હતા. ચમારીઆ ગામના ગ્રામજનોએ યોગ જાગૃતિ માટે રાત્રિ યોગ સંવાદનું આયોજન કરવા બદલ ગુજરાત રાજ્ય યોગ બોર્ડ, ગાંધીનગર તથા ચેરમેન આદરણીય યોગસેવક શ્રી શિશપાલજી સાહેબ પ્રત્યે આભારની લાગણી વ્યક્ત કરી હતી. યોગ બોર્ડનો સંદેશ : યોગને જીવનનો અભિન્ન ભાગ બનાવીને સ્વસ્થ, સમર્થ અને નિરોગી સમાજના નિર્માણમાં સૌએ સહભાગી બનવું જોઈએ. "કરો યોગ, રહો નિરોગ" અને "ઘર-ઘર પે હમ જાયેંગે, સબકો યોગ શિખાયેંગે"ના સંકલ્પ સાથે ચમારીઆ ગામમાં યોગ જાગૃતિની નવી પહેલને આવકારવામાં આવી હતી.