વણેસા ગામના ભીમડા ફળિયામાં દીપડી અને નોળિયા વચ્ચે પાંચ મિનિટ સુધી જંગ: નોળિયાના વળતા હુમલાથી દીપડીએ કરવી પડી પીછેહઠ, સમગ્ર ઘટના કેમેરામાં કેદ

સાપ અને નોળિયા વચ્ચેની લડાઈ વિશે સૌએ સાંભળ્યું હશે અને અનેક લોકોએ જોઈ પણ હશે, પરંતુ દીપડી અને નોળિયા વચ્ચેની લડાઈ ભાગ્યે જ જોવા મળે છે. ત્યારે સુરત જિલ્લાના પલસાણા તાલુકાના વણેસા ગામના ભીમડા ફળિયામાં દીપડી અને નોળિયા વચ્ચે થયેલી આવી જ એક રોમાંચક લડાઈ કેમેરામાં કેદ થતાં સમગ્ર વિસ્તારમાં ચર્ચાનો વિષય બની છે. પલસાણા તાલુકાનું વણેસા ગામ અને ખાસ કરીને ગૌચર ફળિયા તથા ભીમડા ફળિયા વિસ્તાર જાણે દીપડાઓનું રહેઠાણ બની રહ્યો હોય તેવી સ્થિતિ જોવા મળી રહી છે. આ વિસ્તારમાં અત્યાર સુધીમાં ત્રણ નર દીપડા, એક માદા દીપડી તેમજ બે-ત્રણ મહિનાનાં બચ્ચાંને પકડવામાં આવ્યાં હોવાની માહિતી સામે આવી છે. તેમ છતાં આ વિસ્તારમાં હજુ પણ અનેક દીપડાઓ મુક્તપણે ફરતા હોવાની ચર્ચા સ્થાનિકોમાં જોવા મળી રહી છે. સામાન્ય રીતે દીપડા નિશાચર પ્રાણી હોવાથી રાત્રિના સમયે શિકારની શોધમાં ગામની શેરીઓ, મહોલ્લાઓ અને રહેણાક વિસ્તારોમાં આવતા હોય છે. પરંતુ વણેસા ગામના ભીમડા ફળિયા વિસ્તારમાં દીપડાઓ દિવસ દરમિયાન પણ બિન્દાસ લટાર મારતા અને શિકારની શોધમાં ફરતા જોવા મળી રહ્યા છે, જેના કારણે સ્થાનિકોમાં ભયનો માહોલ છે. આવો જ એક ચોંકાવનારો બનાવ વણેસા ગામના ભીમડા ફળિયા નજીક બન્યો હતો. ગામના આયુષ હળપતિ સાંજના સમયે ભીમડા ફળિયાથી અમલસાડી ગામની દૂધ મંડળીમાં દૂધ આપવા જઈ રહ્યા હતા. ત્યારે ભીમડા ફળિયા અને ગોટીયા ફળિયા વચ્ચે આવેલી એક પડતર જગ્યામાં તેમને એક દીપડો બેઠેલો જોવા મળ્યો હતો. આ અંગે આયુષે તાત્કાલિક ફ્રેન્ડ્સ ઓફ એનિમલ્સ વેલ્ફેર ટ્રસ્ટના જતીન રાઠોડને જાણ કરી હતી. માહિતી મળતાં જ જતીન રાઠોડ ઘટનાસ્થળે પહોંચી ગયા હતા. બીજી તરફ મહોલ્લામાં દીપડો દેખાયાની જાણ થતાં આસપાસના લોકો પણ તેને જોવા માટે એકત્રિત થઈ ગયા હતા. જતીન રાઠોડે પોતાના કેમેરામાં દીપડાની હિલચાલ કેદ કરવાનું શરૂ કર્યું હતું. આ દરમિયાન તેમણે જોયું કે ત્યાં આશરે અઢી વર્ષની એક માદા દીપડી શિકારની રાહ જોઈને બેઠી હતી. થોડા સમય બાદ દીપડી ધીમે ધીમે ઊભી થઈ અને નજીકમાં રહેલા એક નોળિયાનો શિકાર કરવાની કોશિશ કરવા લાગી હતી. જોકે, દીપડીનો હુમલો થતાં જ નોળિયાએ પણ હિંમત બતાવી સામો હુમલો કર્યો હતો. નોળિયાના વળતા હુમલાથી દીપડીને પીછેહઠ કરીને થોડે દૂર ખસી જવાની ફરજ પડી હતી. પરંતુ નોળિયો પણ હાર માનવા તૈયાર ન હતો અને ફરી દીપડી સામે આવી ગયો હતો. આમ, બંને પ્રાણીઓ વચ્ચે અંદાજે ચારથી પાંચ મિનિટ સુધી રસાકસીભરી લડાઈ ચાલી હતી. ઘટનાસ્થળે હાજર લોકો આ અદભુત દૃશ્ય નિહાળતા રહ્યા હતા. અંતે દીપડી અને નોળિયો બંને નજીકના કોતર વિસ્તારમાં જતા રહ્યા હતા. દીપડી દ્વારા નોળિયાનો શિકાર કરવાનો પ્રયાસ અને નોળિયા દ્વારા કરાયેલો વળતો હુમલો સહિતની સમગ્ર ઘટના જતીન રાઠોડે પોતાના કેમેરામાં કેદ કરી હતી. દીપડી જેવા શક્તિશાળી જંગલી પ્રાણી સામે નોળિયાએ બતાવેલી હિંમતનો આ વીડિયો હાલ આકર્ષણનું કેન્દ્ર બન્યો છે. જોકે, વણેસા ગામના ભીમડા ફળિયા વિસ્તારમાં વારંવાર દીપડાઓ દેખાતા હોવાથી સ્થાનિકોમાં ભયનો માહોલ છે. દિવસ દરમિયાન પણ દીપડાઓની અવરજવર જોવા મળતી હોવાથી વન વિભાગ દ્વારા આ વિસ્તારમાં પેટ્રોલિંગ વધારી, દીપડાઓની હિલચાલ પર નજર રાખી યોગ્ય સુરક્ષાત્મક પગલાં લેવામાં આવે તેવી સ્થાનિકોમાં માંગ ઊઠી રહી છે.