બાવળામાં ભગવાન જગન્નાથજીની 69મી ભવ્ય રથયાત્રા ભક્તિમય માહોલમાં સંપન્ન

AHMEDABAD | By Akhand Bharat Team | Published: 2026-07-16

ધર્મ

બાવળામાં ભગવાન જગન્નાથજીની 69મી ભવ્ય રથયાત્રા ભક્તિમય માહોલમાં સંપન્ન

અમદાવાદ જિલ્લાના બાવળા તાલુકામાં ભગવાન જગન્નાથજીની 69મી ભવ્ય રથયાત્રા ભક્તિમય માહોલ વચ્ચે નીકળી હતી. રથયાત્રાના મુખ્ય યજમાનો વિજયભાઈ રબારી અને સંજયભાઈ ઠાકોરે ભગવાન જગન્નાથજીની વિધિવત પૂજા-અર્ચના કરીને રથયાત્રાનો પ્રારંભ કરાવ્યો હતો. સવારે 7:00 વાગ્યે રામજી મંદિરથી રામધુનના ગુંજતા નાદ સાથે નગરયાત્રા નીકળી હતી. સમગ્ર માર્ગ પર ભક્તો ભગવાનના નામનો જાપ અને ભજન-કીર્તન કરતાં આગળ વધ્યા હતા, જેના કારણે સમગ્ર બાવળા શહેર ભક્તિમય રંગમાં રંગાઈ ગયું હતું. મોટી સંખ્યામાં ભક્તો, ગ્રામજનો તેમજ ગામના આગેવાનો રથયાત્રામાં જોડાઈ ભગવાન જગન્નાથજીના દર્શનનો લાભ લીધો હતો. બપોરે 12:00 વાગ્યે નગરયાત્રા ત્રિવેણી ધામ રામ રોટી અન્નક્ષેત્ર ખાતે પહોંચી હતી, જ્યાં ભગવાન જગન્નાથજીને પ્રસાદ અર્પણ કરવામાં આવ્યો હતો. ત્યારબાદ ભક્તોએ મહાપ્રસાદનો લાભ લીધો હતો. બપોરે 3:00 વાગ્યે ત્રિવેણી ધામથી રામધુન સાથે નગરયાત્રા ફરી શરૂ થઈ હતી. રથયાત્રાના સમગ્ર માર્ગ પર ગામજનો દ્વારા ભક્તો માટે ઠંડા પીવાના પાણીની સુંદર વ્યવસ્થા કરવામાં આવી હતી. ઉપરાંત ટાવર ચોક ખાતે દેવેન્દ્ર રાણા, પુનમભાઈ રાણા અને રવિભાઈ પગી દ્વારા નગરયાત્રામાં જોડાયેલા ભક્તો માટે ઠંડા પીણાની સેવા પૂરી પાડવામાં આવી હતી, જેની ભક્તોએ પ્રશંસા કરી હતી. સમગ્ર રથયાત્રા દરમિયાન ભક્તોને કોઈપણ પ્રકારની અગવડતા ન પડે તેમજ કાયદો અને વ્યવસ્થા જળવાઈ રહે તે માટે બાવળા પોલીસ સ્ટેશનના અધિકારીઓ અને પોલીસ જવાનોએ ખડેપગે રહી સુરક્ષા અને ટ્રાફિકની વ્યવસ્થા સંભાળી હતી. સાંજે અંદાજે 7:30 વાગ્યે ભગવાન જગન્નાથજીની 69મી રથયાત્રા રામજી મંદિર ખાતે પરત ફરી હતી. આ પ્રસંગે આયોજકો દ્વારા ગામના આગેવાનો, ગ્રામજનો, ભક્તો તેમજ બાવળા પોલીસ સ્ટેશનના અધિકારીઓ અને કર્મચારીઓનો હૃદયપૂર્વક આભાર વ્યક્ત કરવામાં આવ્યો.