(२)*ન્યૂઝ રિપોર્ટર ઘિસારામ ચૌધરી**આહવા તાલુકાના પિપલઘોડી ગામમાં ખેડૂતોને પ્રાકૃતિક ખેતી અંગેની તાલીમ અપાઈ :*

વિરમગામ ખાતે અષાઢી બીજના પાવન અવસરે આનંદ મંદિર એજ્યુકેશન – આનંદ પ્રાથમિક અને માધ્યમિક શાળા દ્વારા 67મા વર્ષમાં મંગલ પ્રવેશ નિમિત્તે ભવ્ય સરસ્વતી નગરયાત્રાનું આયોજન કરવામાં આવ્યું. આ પ્રસંગે શાળાના ટ્રસ્ટી શ્રી મનુદાદા ઉપસ્થિત રહ્યા હતા. માતા સરસ્વતીના જયઘોષ સાથે નીકળેલી નગરયાત્રામાં વિદ્યાર્થીઓ, શિક્ષકો, વાલીઓ અને નગરજનોએ ઉત્સાહભેર ભાગ લીધો હતો. યાત્રા દરમિયાન શિક્ષણનું મહત્ત્વ, ભારતીય સંસ્કૃતિ અને સંસ્કારોનો સંદેશ આપતી વિવિધ રજૂઆતો સૌના આકર્ષણનું કેન્દ્ર બની હતી. સ્થાપના વર્ષ 1960થી શિક્ષણની અવિરત સેવા આપતી સંસ્થાએ 66 વર્ષ સફળતાપૂર્વક પૂર્ણ કરીને 67મા વર્ષમાં મંગલ પ્રવેશ કર્યો છે. આ અવસરે સમગ્ર સંસ્થા પરિવારે ગુણવત્તાસભર શિક્ષણ, સંસ્કાર અને સર્વાંગી વિકાસની પરંપરાને વધુ સમૃદ્ધ બનાવવાનો સંકલ્પ વ્યક્ત કર્યો હતો.

વિરમગામ શહેર ભગવાન શ્રી જગન્નાથજીની ભક્તિના રંગે રંગાઈ ગયું હતું. ભગવાન શ્રી જગન્નાથજીની ભવ્ય રથયાત્રામાં શહેરના હજારો શ્રદ્ધાળુઓએ ઉત્સાહભેર ભાગ લીધો હતો. સમગ્ર યાત્રામાર્ગ પર ભક્તોના જયઘોષ, ભજન-કીર્તન અને ઢોલ-નગારાના નાદથી વાતાવરણ ગુંજી ઉઠ્યું હતું. શણગારેલા રથમાં બિરાજમાન ભગવાન શ્રી જગન્નાથજી, બલભદ્રજી અને સુભદ્રાજીના દર્શન કરવા માટે રસ્તાની બંને બાજુએ મોટી સંખ્યામાં લોકો ઉમટી પડ્યા હતા. શહેરના વિવિધ વિસ્તારોમાં વેપારીઓ, સેવાભાવી સંસ્થાઓ અને યુવા મંડળો દ્વારા પાણી, શરબત, છાશ, ફળ અને પ્રસાદનું વિતરણ કરવામાં આવ્યું હતું. અનેક સ્થળોએ ભક્તોએ પુષ્પવર્ષા કરીને ભગવાનનું ભવ્ય સ્વાગત કર્યું હતું. મહિલાઓ, યુવાનો, બાળકો અને વડીલોએ પણ ભારે ઉત્સાહ સાથે રથયાત્રામાં ભાગ લીધો હતો. પોલીસ, હોમગાર્ડ, આરોગ્ય વિભાગ, નગરપાલિકા અને સ્વયંસેવકોની કામગીરીના કારણે સમગ્ર કાર્યક્રમ શાંતિપૂર્ણ અને સુવ્યવસ્થિત રીતે પૂર્ણ થયો હતો. રથયાત્રાએ વિરમગામમાં ધાર્મિક આસ્થા, સામાજિક એકતા અને ભાઈચારાનો સુંદર સંદેશ પ્રસરાવ્યો હતો.

નેશનલ હાઇવે નંબર 48 પર ફરી એકવાર લોહીયાળ અકસ્માતની ઘટના સામે આવી છે. અમદાવાદથી મુંબઈ તરફ જતા ટ્રેક પર, પલસાણાના ચલથાણ ગામની હદમાં આવેલી સંજીવની હોસ્પિટલની બિલકુલ સામે એક ગમખ્વાર અકસ્માત સર્જાયો હતો. પૂરપાટ ઝડપે આવી રહેલા GJ-19-Y સિરીઝના એક આઇસર ટેમ્પોના ચાલકે મોટરસાયકલ સવારને અડફેટે લીધો હતો. ટક્કર એટલી ભયાનક હતી કે બાઇક પરથી નીચે ફેંકાયેલા ચાલકનું માથું સીધું આઇસરના ટાયર નીચે આવી ગયું હતું. માથું કચડાઈ જવાને કારણે બાઇક ચાલકનું ઘટનાસ્થળે જ કમકમાટીભર્યું મોત નીપજ્યું હતું. ઘટનાને પગલે હાઇવે પર લોકોના ટોળા એકઠા થઈ ગયા હતા અને ટ્રાફિક જામના દ્રશ્યો સર્જાયા હતા. હાલ આ મામલે સ્થાનિક પોલીસને જાણ કરાતા પોલીસે ઘટનાસ્થળે પહોંચી આગળની કાર્યવાહી હાથ ધરી છે.

ભારત સરકારના વિજ્ઞાન અને પ્રૌદ્યોગિકી મંત્રાલય દ્વારા આયોજિત પ્રતિષ્ઠિત "Sakura Science High School Programme (SSHP)" અંતર્ગત જાપાનના સફળ શૈક્ષણિક પ્રવાસે ગયેલી વલસાડ જિલ્લાની તેજસ્વી બાળ વૈજ્ઞાનિક કુમારી પ્રિયાંશીકુમારી કનુભાઈ થોરાત વૈશ્વિક વિજ્ઞાન અને અદ્યતન ટેકનોલોજીનો અદ્ભુત અનુભવ મેળવીને વતન પરત ફરી છે. 28 જૂન થી 4 જુલાઈ, 2026 દરમિયાન યોજાયેલ જાપાનની આ શૈક્ષણિક અભ્યાસ મુલાકાત પ્રવાસમાં ધરમપુર તાલુકાની 'કેળવણી પટેલ ફ. પ્રાથમિક શાળા' ની આ વિદ્યાર્થીની દેશભરમાંથી પસંદ થયેલા માત્ર 56 પ્રતિભાવંત વિદ્યાર્થીઓના પ્રતિનિધિ મંડળમાં ગુજરાતનું પ્રતિનિધિત્વ કરી રહી હતી. પ્રિયાંશીની આ સિદ્ધિ માટે તેને માર્ગદર્શન આપનાર કેળવણી પટેલ ફળિયા પ્રાથમિક શાળા, તા. ધરમપુરના તત્કાલીન વિજ્ઞાન શિક્ષક શ્રી જતીનકુમાર મહેશભાઈ પટેલ (કે જેઓ હાલ નવસારી જીલ્લાની ચારમુળી વર્ગશાળા, ખાટાઆંબા, તા. વાંસદામાં કાર્યરત છે.), હાલના વિજ્ઞાન શિક્ષિકા શ્રીમતી હેતલબેન પટેલ, શાળાના આચાર્યા શ્રીમતી રશ્મિબેન પટેલ પણ એટલા જ યશભાગી છે. તેમણે પ્રિયાંશીની આ સિદ્ધિ માટે તેને ખુબ ખુબ અભિનંદન પાઠવ્યા છે. સાથે જ તેણે જે જગ્યાએ અભ્યાસ કર્યો છે તે આદર્શ નિવાસી શાળા કપરાડા, અને તેની હાલની શાળા ધરમપુર નગરપાલિકા હાઈસ્કુલનાં આચાર્યશ્રીઓએ પણ તેને અભિનંદન પાઠવ્યા છે. પ્રિયાંશીનાં પિતા કનુભાઈ થોરાત અને માતા મનિષાબેન થોરાત પણ તેની આ સિદ્ધિથી ગૌરવાન્વિત અને ગદગદિત છે. જાપાન સાયન્સ એન્ડ ટેકનોલોજી એજન્સી (JST) ના નેજા હેઠળ યોજાયેલા આ આંતરરાષ્ટ્રીય એક્સચેન્જ પ્રોગ્રામ દરમિયાન પ્રિયાંશીકુમારીએ જાપાનના વિશ્વપ્રસિદ્ધ વિજ્ઞાન કેન્દ્રો અને શૈક્ષણિક સંસ્થાઓની મુલાકાત લીધી હતી. પ્રવાસ દરમિયાન પ્રિયાંશીએ જાપાનની પ્રતિષ્ઠિત સ્પેસ એજન્સી 'JAXA સુકુબા સ્પેસ સેન્ટર' ની મુલાકાત લીધી હતી, અને સેટેલાઇટ ટેકનોલોજી વિશે ઊંડાણપૂર્વક સમજ મેળવી હતી. જાપાનની સર્વશ્રેષ્ઠ 'ટોક્યો યુનિવર્સિટી' ના મુખ્ય કૅમ્પસની મુલાકાત લઈને પ્રિયાંશીએ ત્યાં ભૌતિકશાસ્ત્ર, ગણિત અને બ્રહ્માંડ વિજ્ઞાનના ક્ષેત્રે ચાલી રહેલા અદ્યતન સંશોધનોનો માહોલ નિહાળ્યો હતો. પ્રવાસ દરમિયાન સમગ્ર જૂથ સાથે તેણે ટોક્યો યુનિવર્સિટીના જાણીતા વૈજ્ઞાનિકોના વ્યાખ્યાન પણ સાંભળ્યા હતા. પ્રવાસના સફળ સમાપન બાદ તેને JST તરફથી પ્રતિષ્ઠિત 'Certificate of Achievement' એનાયત કરાયું છે અને તે હવે વૈશ્વિક "સકુરા સાયન્સ ક્લબ" ની આજીવન સભ્ય બની ગઈ છે. અત્રે ઉલ્લેખનીય છે કે પ્રિયાંશીએ વર્ષ 2022-23માં મેળવેલ ઈન્સ્પાયર એવોર્ડના પ્રોજેક્ટ “UNIVERSAL HANDLE FOR CLEANING” સાથે તેણે રાષ્ટ્રીય કક્ષાએ યોજાયેલ પ્રદર્શનમાં શ્રેષ્ઠ દેખાવ કરવાના કારણે તેની આ આંતરરાષ્ટ્રીય પ્રવાસની ટીમમાં પસંદગી થઇ હતી. એક અંતરિયાળ અને ગ્રામીણ પૃષ્ઠભૂમિ ધરાવતા વિસ્તારમાંથી વૈશ્વિક સ્તરે ટોક્યો યુનિવર્સિટી અને જાપાનની સ્પેસ એજન્સી સુધીની સફર સફળતાપૂર્વક પૂર્ણ કરીને પરત ફરેલી પ્રિયાંશી થોરાટ માટે સમગ્ર વલસાડ જીલ્લો આનદ અને ગૌરવની લાગણી અનુભવે છે. જિલ્લા શિક્ષણ અને તાલીમ ભવન (DIET) વલસાડના પ્રાચાર્યશ્રી શ્રી મહેન્દ્રકુમાર આર. પટેલ, જિલ્લા શિક્ષણાધિકારીશ્રી ડૉ. રાજેશ્રી ટંડેલ અને જિલ્લા પ્રાથમિક શિક્ષણાધિકારીશ્રી શ્રી ડી.બી.વસાવા તથા ધરમપુર તાલુકા પંચાયત પ્રમુખ શ્રીમતી શકુંતલાબેન એસ.ચૌધરી અને તાલુકા પ્રાથમિક શિક્ષણાધિકારી શ્રીમતિ કૌશરબેનએ પણ પ્રિયાંશીને ખુબ ખુબ અભિનંદન પાઠવ્યા છે. જિલ્લા વિજ્ઞાન અધિકારીશ્રી શ્રી પ્રજ્ઞેશભાઈ રાઠોડ તથા સરકારી ઇજનેરી કોલેજ, વલસાડના ડૉ. ભદ્રેશ સુદાણી કે જેઓ છેલ્લા કેટલાય વર્ષોથી સતત ઈન્સ્પાયર એવોર્ડી વિદ્યાર્થીઓને માર્ગદર્શિત કરતા રહ્યા છે તેમણે અને સમગ્ર વલસાડ જિલ્લા શિક્ષણ વિભાગે પ્રિયાંશીની આ ઐતિહાસિક સફળતાને જિલ્લા માટે સુવર્ણ ક્ષણ ગણાવી છે. પ્રિયાંશીની આ સફરમાં દરેક તબક્કે શિક્ષકો, આચાર્યશ્રી, જીલ્લા કક્ષાએ તજજ્ઞશ્રીઓ અને રાજ્ય કક્ષાએથી તત્કાલીન નોડલ ઓફિસરશ્રી ડૉ. વિજયભાઈ એસ. પટેલ અને હાલના સ્ટેટ કન્વીનરશ્રી ડૉ. કપિલદેવ વસાણી સાહેબ તરફથી પણ સતત પ્રેરણા અને પ્રોત્સાહન મળી રહ્યા છે, તે સૌ માટે પ્રિયાંશી પણ પોતાની કૃતજ્ઞતા વ્યક્ત કરે છે. પ્રિયાંશીની આ વૈશ્વિક સિદ્ધિ વલસાડ જિલ્લાના અન્ય હજારો ગ્રામીણ અને સરકારી શાળાના વિદ્યાર્થીઓ માટે વિજ્ઞાન, સંશોધન અને નવીન ટેકનોલોજીના ક્ષેત્રમાં આગળ વધવા માટે દીવાદાંડી સમાન અને પ્રેરણારૂપ સાબિત થશે એવી અભિલાષા. રાજ્ય અને કેન્દ્ર સરકારની આ જ્વલંત યોજનાનો લાભ વલસાડ જીલ્લાના ઘણા વિદ્યાર્થીઓ લઇ રહ્યા છે અને અલગ અલગ સ્તરે ઈન્સ્પાયર એવોર્ડ યોજનામાં સારો દેખાવ કરી રહ્યા છે, તે માટે જિલ્લા શિક્ષણ અને તાલીમ ભવન, વલસાડ અને જીલ્લાનું શિક્ષણ તંત્ર સતત પ્રયત્નશીલ છે.

તુષાર જોષી ભાવનગર: પર્યાવરણ સંરક્ષણ અને હરિયાળા ભાવનગરના નિર્માણ માટે ગ્રીનસિટી ચેરિટેબલ ટ્રસ્ટ દ્વારા એક અનોખી "ગિફ્ટ યોજના" શરૂ કરવામાં આવી છે. આ યોજના હેઠળ શહેરના દરેક નાગરિકને પોતાના ઘર, સોસાયટી, શાળા, સંસ્થા અથવા આસપાસની ખુલ્લી જગ્યામાં ઓછામાં ઓછું એક વૃક્ષ વાવી તેનું નિયમિત જતન કરવા માટે પ્રોત્સાહિત કરવામાં આવશે. વૃક્ષારોપણ કરીને તેનું જતન કરનાર પર્યાવરણપ્રેમીઓને ટ્રસ્ટ દ્વારા વિશેષ સરપ્રાઇઝ ગિફ્ટ આપી સન્માનિત કરવામાં આવશે.યોજનાનો લાભ મેળવવા માટે નાગરિકોએ વૃક્ષ વાવ્યા બાદ તેની સાથે પોતાનું નામ, સરનામું અને મોબાઇલ નંબર ઉલ્લેખ કરીને ફોટોગ્રાફ ગ્રીનસિટી ટ્રસ્ટના વોટ્સએપ નંબર 98259 60988 પર મોકલવાનો રહેશે. ટ્રસ્ટ દ્વારા માહિતીની ચકાસણી કર્યા બાદ ગિફ્ટ આપવામાં આવશે.ગ્રીનસિટી ચેરિટેબલ ટ્રસ્ટ છેલ્લા 15 વર્ષથી ભાવનગરમાં પર્યાવરણ જાગૃતિ, વૃક્ષારોપણ અને વૃક્ષ સંવર્ધન માટે સતત કાર્યરત છે. ટ્રસ્ટના પ્રયાસોથી શહેરના વિવિધ વિસ્તારોમાં અત્યાર સુધીમાં 2 લાખથી વધુ વૃક્ષોનું વાવેતર અને સફળ સંવર્ધન કરવામાં આવ્યું છે. ટ્રસ્ટ દર વર્ષે હજારો રોપાઓનું નિઃશુલ્ક વિતરણ કરીને નાગરિકોને હરિયાળી અભિયાન સાથે જોડે છે.આ વર્ષે પણ 14 ઓગસ્ટ સુધી શહેરના વિવિધ વિસ્તારોમાં વિવિધ જાતના વૃક્ષોના રોપાઓનું વિનામૂલ્યે વિતરણ કરવામાં આવશે. જેમની પાસે ટ્રી-ગાર્ડની વ્યવસ્થા ન હોય તેઓ પીપળ, કરંજ, સપ્તપર્ણી, કડંબ, દેશી કરંજ જેવા પશુઓથી ઓછા નુકસાન પામતા વૃક્ષોનું વાવેતર કરી શકે છે. માત્ર નિયમિત પાણી, યોગ્ય ટેકો અને ત્રણ વર્ષ સુધી જતન કરવામાં આવે તો આ વૃક્ષો ભવિષ્યમાં વિશાળ સ્વરૂપ ધારણ કરીને પર્યાવરણને સમૃદ્ધ બનાવશે.ટ્રસ્ટના પ્રમુખ દેવેનભાઈ આર. શેઠે જણાવ્યું હતું કે, "પર્યાવરણનું જતન માત્ર સરકાર કે સંસ્થાની જવાબદારી નથી, પરંતુ દરેક નાગરિકની ફરજ છે. જો દરેક પરિવાર માત્ર એક વૃક્ષ વાવી તેનું સંવર્ધન કરે તો ભાવનગરને હરિયાળું, સ્વચ્છ અને પ્રદૂષણમુક્ત શહેર બનાવવાનું સ્વપ્ન ઝડપથી સાકાર થઈ શકે. આ અભિયાનમાં દરેક ભાવનગરવાસી ઉત્સાહપૂર્વક જોડાય તેવી અમારી અપેક્ષા છે."ગ્રીનસિટી ચેરિટેબલ ટ્રસ્ટે શહેરના તમામ નાગરિકો, યુવાનો, વિદ્યાર્થીઓ, સામાજિક સંસ્થાઓ અને રહેણાંક સોસાયટીઓને આ અભિયાનમાં સક્રિય ભાગ લેવા અનુરોધ કર્યો છે. **"એક વ્યક્તિ – એક વૃક્ષ"**ના સંકલ્પ સાથે શરૂ થયેલી આ પહેલ ભાવનગરને હરિયાળું, સ્વચ્છ અને પર્યાવરણમૈત્રી શહેર બનાવવામાં મહત્વપૂર્ણ યોગદાન આપશે.