ગરુડેશ્વર ધામે પરમ પૂજ્ય વાસુદેવાનંદ સરસ્વતી સ્વામી મહારાજની 111મી પુણ્યતિથિ નિમિત્તે ભવ્ય ધાર્મિક મહોત્સવ યોજાયો નર્મદા જિલ્લાના પવિત્ર તીર્થધામ ગરુડેશ્વર ખાતે પરમ પૂજ્ય વાસુદેવાનંદ સરસ્વતી સ્વામી મહારાજ (ટેમ્બે સ્વામી મહારાજ)ની 111મી પુણ્યતિથિ નિમિત્તે ભવ્ય ધાર્મિક મહોત્સવનું આયોજન કરવામાં આવ્યું હતું. ગુજરાત ઉપરાંત મહારાષ્ટ્ર, મધ્યપ્રદેશ સહિત વિવિધ રાજ્યોમાંથી મોટી સંખ્યામાં દત્તભક્તો ગરુડેશ્વર ધામે ઉમટી પડ્યા હતા.પરંપરા મુજબ વડોદરાથી પ્રસ્થાન કરેલો પગપાળા દત્ત સંઘ તિલકવાડા ખાતે રાત્રિ વિશ્રામ બાદ વહેલી સવારે ગરુડેશ્વર પહોંચ્યો હતો. ભક્તોએ દત્ત મંદિર અને ટેમ્બે સ્વામી મહારાજના પવિત્ર સ્થાનકમાં દર્શન-પૂજન કરી આશીર્વાદ પ્રાપ્ત કર્યા હતા. દિવસ દરમિયાન દત્ત નામસ્મરણ, ભજન, ધાર્મિક પ્રવચનો અને વિવિધ આધ્યાત્મિક કાર્યક્રમો યોજાતા સમગ્ર ધામ ભક્તિમય વાતાવરણથી ગુંજી ઉઠ્યું હતું.મહોત્સવનું મુખ્ય આકર્ષણ ટેમ્બે સ્વામી મહારાજની પાલખીની ભવ્ય શોભાયાત્રા રહી હતી. નાસિક ડ્રમના ગર્જતા તાલ અને દત્ત નામના જયઘોષ વચ્ચે પાલખીએ ગરુડેશ્વર ગામના મુખ્ય માર્ગો પર પરિભ્રમણ કર્યું હતું. માર્ગમાં શ્રદ્ધાળુઓએ પુષ્પવર્ષા કરીને પાલખીનું ભાવભર્યું સ્વાગત કર્યું હતું. પરિભ્રમણ પૂર્ણ થયા બાદ દત્ત મંદિરે મહાઆરતી અને વિશેષ પૂજન યોજાયું હતું.મહોત્સવ દરમિયાન આધ્યાત્મિક વિષય પર આધારિત ગુજરાતી ફિલ્મ 'યોગીરાજ અવધૂત' સાથે સંકળાયેલા કલાકારોની ઉપસ્થિતિ પણ આકર્ષણનું કેન્દ્ર બની હતી. ભક્તોએ તેમની સાથે મુલાકાત કરી ઉત્સાહ વ્યક્ત કર્યો હતો.યાત્રાળુઓની સુવિધા માટે સેવાભાવી સંસ્થાઓ અને સ્વયંસેવકો દ્વારા ભોજન પ્રસાદ, ચા-નાસ્તો, પીવાનું શુદ્ધ પાણી તેમજ આરોગ્ય સેવાઓ સહિતની વિવિધ વ્યવસ્થાઓ કરવામાં આવી હતી. સમગ્ર આયોજન સેવાભાવ, શિસ્ત અને ગુરુભક્તિના સુંદર સમન્વય સાથે સફળતાપૂર્વક સંપન્ન થયું હતું.111મી પુણ્યતિથિ નિમિત્તે યોજાયેલા આ મહોત્સવે ગરુડેશ્વર ધામમાં ભક્તિ, શ્રદ્ધા અને સેવાની ભાવનાને વધુ પ્રબળ બનાવી હતી અને દત્તભક્તો માટે આ પ્રસંગ યાદગાર બની રહ્યો હતો.
