સાબરકાંઠાના વધુ 7 આરોગ્ય કેન્દ્રોને રાષ્ટ્રીય સ્તરનું NQAS પ્રમાણપત્ર. જિલ્લાની કુલ 138 આરોગ્ય સંસ્થાઓએ મેળવ્યું નેશનલ ક્વોલિટી સર્ટિફિકેશન

હિંમતનગર: સાબરકાંઠા જિલ્લાના ગ્રામ્ય અને અંતરિયાળ વિસ્તારોના લોકોને ગુણવત્તાસભર, સુરક્ષિત અને સુલભ આરોગ્ય સેવાઓ ઉપલબ્ધ કરાવવાની દિશામાં જિલ્લા આરોગ્ય તંત્રને વધુ એક મોટી સિદ્ધિ મળી છે. જિલ્લા વિકાસ અધિકારીશ્રીના માર્ગદર્શન હેઠળ આરોગ્ય વિભાગ દ્વારા હાથ ધરવામાં આવેલા સતત ગુણવત્તા સુધારણા, મોનિટરિંગ અને અસરકારક આરોગ્ય વ્યવસ્થાપનના પરિણામે જિલ્લાના વધુ 7 આરોગ્ય કેન્દ્રોએ રાષ્ટ્રીય સ્તરનું National Quality Assurance Standards (NQAS) પ્રમાણપત્ર મેળવ્યું છે. આત્રોંલીવાસ દોલજી પ્રાથમિક આરોગ્ય કેન્દ્ર ઉપરાંત ગાડુ, લાલપુર, નેત્રામલી, જાલેટી, વલસાડી અને બહેડીયા આયુષ્માન આરોગ્ય મંદિર દ્વારા NQAS હેઠળ નિર્ધારિત વિવિધ ગુણવત્તા માપદંડોનું સફળતાપૂર્વક પાલન કરવામાં આવતા આ રાષ્ટ્રીય પ્રમાણપત્ર એનાયત કરવામાં આવ્યું છે. NQAS પ્રમાણપત્ર મેળવવા માટે આરોગ્ય સંસ્થાઓમાં ક્લિનિકલ ગવર્નન્સ, દર્દીઓની સલામતી, ઇન્ફેક્શન પ્રિવેન્શન એન્ડ કંટ્રોલ, બાયોમેડિકલ વેસ્ટ મેનેજમેન્ટ, દવાઓ અને જરૂરી આરોગ્ય સામગ્રીની ઉપલબ્ધતા, સ્વચ્છતા, સેનિટેશન, રેકોર્ડ અને ડોક્યુમેન્ટેશન, ડેટા આધારિત મોનિટરિંગ તેમજ દર્દી-કેન્દ્રિત આરોગ્ય સેવાઓ સહિતના વિવિધ માપદંડોનું મૂલ્યાંકન કરવામાં આવે છે. મુખ્ય જિલ્લા આરોગ્ય અધિકારી ડૉ. રાજ સુતરિયાએ જણાવ્યું હતું કે, માર્ગદર્શક નેતૃત્વ, ટીમવર્ક, સતત મોનિટરિંગ અને ગુણવત્તા સુધારણા માટેના સાતત્યપૂર્ણ પ્રયાસોના પરિણામે સાબરકાંઠા જિલ્લો ગ્રામ્ય આરોગ્ય સેવાઓમાં ગુણવત્તાના નવા માપદંડો સ્થાપિત કરી રહ્યો છે. NQAS પ્રમાણપત્ર આરોગ્ય સંસ્થાઓમાં ગુણવત્તા અને દર્દી સલામતી પ્રત્યેની પ્રતિબદ્ધતાની રાષ્ટ્રીય સ્તરની માન્યતા છે. સાબરકાંઠા જિલ્લામાં અત્યાર સુધીમાં કુલ 138 આરોગ્ય સંસ્થાઓને National Quality Certification પ્રાપ્ત થયું છે. જેમાં 107 આયુષ્માન આરોગ્ય મંદિર, 29 પ્રાથમિક આરોગ્ય કેન્દ્ર (PHC), 1 સબ-ડિસ્ટ્રિક્ટ હોસ્પિટલ અને 1 અર્બન હેલ્થ સેન્ટરનો સમાવેશ થાય છે. જિલ્લા ક્વોલિટી એશ્યોરન્સ મેડિકલ ઓફિસર ડૉ. એ.આઈ. મલેક તથા સંબંધિત તાલુકા આરોગ્ય અધિકારીઓના માર્ગદર્શન હેઠળ આરોગ્ય વિભાગના અધિકારીઓ અને કર્મચારીઓ દ્વારા કરવામાં આવેલા સતત પ્રયાસો અને ટીમભાવનાના પરિણામે આ સિદ્ધિ હાંસલ થઈ છે. જિલ્લા આરોગ્ય તંત્ર દ્વારા આગામી સમયમાં વધુ આરોગ્ય કેન્દ્રોને NQAS સહિતના રાષ્ટ્રીય ગુણવત્તા ધોરણો હેઠળ આવરી લેવા અને ગ્રામ્ય તેમજ અંતરિયાળ વિસ્તારોના નાગરિકોને સુરક્ષિત, વિશ્વસનીય અને દર્દી-કેન્દ્રિત આરોગ્ય સેવાઓ ઉપલબ્ધ કરાવવા માટે કામગીરીને વધુ વેગ આપવાની દિશામાં પ્રયત્નો હાથ ધરવામાં આવી રહ્યા છે.