*વલ્લભીપુર CHCમાં 10 વર્ષ બાદ ઓપરેશન થિયેટર ફરી ધમધમતું થયું**આજે જ દિવસે સ્ત્રીરોગ વિભાગના 6 સફળ ઓપરેશન કરાયા*

*વલ્લભીપુર CHCમાં 10 વર્ષ બાદ ઓપરેશન થિયેટર ફરી ધમધમતું થયું* *આજે જ દિવસે સ્ત્રીરોગ વિભાગના 6 સફળ ઓપરેશન કરાયા* વલ્લભીપુરના CHC ખાતે આશરે 10 વર્ષ બાદ ઓપરેશન થિયેટર ફરી કાર્યરત કરવામાં આવ્યું છે. તા. 24 ને ગુરુવારના રોજ CHC વલ્લભીપુર ખાતે સ્ત્રીરોગ વિભાગના કુલ 6 સફળ ઓપરેશન કરવામાં આવ્યા હતા. CHC વલ્લભીપુરના અધિક્ષક તથા સ્ત્રીરોગ નિષ્ણાત ડૉ. રાજલબા ચુડાસમાના માર્ગદર્શન હેઠળ આ કામગીરી હાથ ધરવામાં આવી હતી. હાલમાં CHC વલ્લભીપુર ખાતે ગાયનેકોજિસ્ટ, એનેસ્થેટિસ્ટ, જર્નલ સર્જન, જર્નલ ફિઝિશિયન અને બાળકોના નિષ્ણાત તબીબોની સેવાઓ ઉપલબ્ધ કરાવવામાં આવી છે. ઓપરેશન થિયેટર ફરી કાર્યરત થવાથી વલ્લભીપુર તાલુકા તથા આસપાસના વિસ્તારના દર્દીઓને સ્થાનિક સ્તરે જ નિષ્ણાત તબીબી સારવાર અને ઓપરેશનની સુવિધા મળી શકશે. આગામી સમયમાં સિઝેરિયન સહિત સ્ત્રીરોગને લગતા જરૂરી ઓપરેશનની સેવાઓ વધુ વિસ્તૃત કરવામાં આવશે. સાથે જ બાળરોગ નિષ્ણાતની સેવા ઉપલબ્ધ હોવાથી આગામી સમયમાં બાળકોને લગતી આરોગ્ય સેવાઓને પણ વધુ સુદૃઢ બનાવવાનું આયોજન છે. જેના કારણે વલ્લભીપુર તાલુકાના બાળકો અને તેમના પરિવારજનોને સામાન્ય તથા જરૂરી સારવાર માટે ભાવનગર જવાની જરૂરિયાતમાં ઘટાડો થશે. આજના સફળ ઓપરેશનમાં આશા બહેનો, હેલ્થ સુપરવાઈઝર તથા CHC વલ્લભીપુરના તબીબી અને સમગ્ર સ્ટાફે ટીમ તરીકે મહત્વપૂર્ણ સહયોગ આપ્યો હતો. સમગ્ર ટીમના સંકલિત પ્રયાસોથી એક જ દિવસે 6 સફળ ઓપરેશન કરવામાં આવ્યા હતા. લગભગ એક દાયકા બાદ CHC વલ્લભીપુરનું ઓપરેશન થિયેટર ફરી કાર્યરત થવું અને પ્રથમ જ દિવસે 6 સફળ સ્ત્રીરોગના ઓપરેશન થવા એ વલ્લભીપુર તાલુકાની આરોગ્ય સેવાઓ માટે મહત્વપૂર્ણ સિદ્ધિ છે. આથી સ્થાનિક લોકોને નજીકમાં જ નિષ્ણાત આરોગ્ય સેવાઓનો લાભ મળવાની સાથે સમય અને મુસાફરીનો ખર્ચ પણ બચશે. દર્દીઓને બહારગામ જવાનું બંધ થશે ... રિપોર્ટ મહેશ ડાવરા