તુષાર જોષી, ભાવનગર જિલ્લા રમતગમત અધિકારીની કચેરી દ્વારા વર્ષ ૨૦૨૬-૨૭ અંતર્ગત શાળાકીય રમતોત્સવ SGFI અંડર-17 ખો-ખો સ્પર્ધા આયોજન કરવામાં આવ્યું હતું. જિલ્લા કક્ષાએ યોજાયેલી આ સ્પર્ધામાં ભાવનગર જિલ્લાની વિવિધ શાળાઓની ટીમોએ ઉત્સાહપૂર્વક ભાગ લીધો હતો.આ સ્પર્ધામાં શ્રી સ્વામિનારાયણ વિદ્યાસાગર સ્કૂલના અંડર-17 ભાઈઓની ખો-ખો ટીમે શાનદાર રમતનું પ્રદર્શન કરી પોતાના શ્રેષ્ઠ ખેલકૌશલ્ય, ટીમવર્ક, શિસ્ત અને આત્મવિશ્વાસનો પરિચય કરાવ્યો હતો. ટીમે સ્પર્ધામાં સતત ઉત્કૃષ્ટ પ્રદર્શન કરીને જિલ્લા કક્ષાએ ચેમ્પિયન બનવાનું ગૌરવ પ્રાપ્ત કર્યું છે.વિદ્યાર્થી ખેલાડીઓએ સમગ્ર સ્પર્ધા દરમિયાન જોરદાર રમત સાથે પ્રતિસ્પર્ધી ટીમો સામે મુકાબલો કરી વિજય મેળવ્યો હતો. ખેલાડીઓની મહેનત, નિયમિત અભ્યાસ, રમત પ્રત્યેની નિષ્ઠા અને ટીમ ભાવનાના પરિણામે શાળાને આ ગૌરવપૂર્ણ સિદ્ધિ પ્રાપ્ત થઈ છે.આ પ્રસંગે શાળાના આચાર્યશ્રી રાજેન્દ્રસિંહ એમ. ગોહિલે વિજેતા ટીમના તમામ ખેલાડીઓને હાર્દિક અભિનંદન પાઠવી તેમની સફળતાની પ્રશંસા કરી હતી. તેમણે જણાવ્યું હતું કે રમતગમત વિદ્યાર્થીઓના સર્વાંગી વિકાસમાં મહત્વની ભૂમિકા ભજવે છે અને વિદ્યાર્થીઓએ રમતગમત સાથે અભ્યાસમાં પણ શ્રેષ્ઠ પ્રદર્શન કરી શાળા તથા પરિવારનું નામ રોશન કરવું જોઈએ.વિજેતા ટીમની સફળતા પાછળ શાળાના પી.ટી. શિક્ષક શ્રી ધીરુભાઈ એમ. ચૌહાણનું માર્ગદર્શન અને સતત મહેનત પણ મહત્વપૂર્ણ રહી હતી. તેમના યોગ્ય માર્ગદર્શન હેઠળ ખેલાડીઓએ નિયમિત પ્રેક્ટિસ કરી પોતાની રમતને વધુ મજબૂત બનાવી હતી.શ્રી સ્વામિનારાયણ વિદ્યાસાગર સ્કૂલના અંડર-17 ખો-ખો ખેલાડીઓની આ સિદ્ધિથી સમગ્ર શાળા પરિવાર, વાલીઓ અને વિદ્યાર્થીઓમાં આનંદની લાગણી પ્રસરી છે. જિલ્લા કક્ષાએ ચેમ્પિયન બન્યા બાદ હવે ખેલાડીઓ આગામી રાજ્ય કક્ષાની સ્પર્ધામાં પણ ઉત્કૃષ્ટ પ્રદર્શન કરી ભાવનગર જિલ્લાનું નામ રોશન કરે તેવી સૌ કોઈએ શુભેચ્છા પાઠવી છે.શાળાના સંચાલક મંડળ, આચાર્યશ્રી, શિક્ષકગણ તથા સમગ્ર શાળા પરિવાર દ્વારા વિજેતા ખેલાડીઓ અને પી.ટી. શિક્ષકશ્રીને અભિનંદન પાઠવી તેમના ઉજ્જવળ રમતગમત ભવિષ્ય માટે હાર્દિક શુભકામનાઓ પાઠવવામાં આવી હતી.“રમતમાં જીત માત્ર ટ્રોફી નથી, પરંતુ મહેનત, શિસ્ત, ટીમવર્ક અને આત્મવિશ્વાસની જીત છે.”શ્રી સ્વામિનારાયણ વિદ્યાસાગર સ્કૂલના આ ખેલાડીઓએ પોતાની સિદ્ધિ દ્વારા આ વાતને સાચી સાબિત કરી છે અને શાળાનું નામ ગૌરવભેર ઉજ્જવળ કર્યું છે.
